كان يا ما كان في جزيرة بعيدة أسمها “جزيرة الوحوش" وكان كل البشر وكمان المخلوقات التانية بتخاف منها، لان القصص عنها كانت مخيفة جدا.
وكان على أول الجزيرة جبل كبير ساكن جواه موشو، موشو دا من الوحوش الطيبين فى الجزيرة وكان عايز يغير فكرة البشر وكل المخلوقات عن الجزيرة، ويبين لكل الناس ان المخلوقات قلي على لجزيرة مش كلهم أشرار، وقال لنفسه: طيب وعرعر دا هو وعصابته السبب في ان الناس تخاف من الجزيرة.
وفجأة سمع موشو صوت جامد جدا، وخرج وشاف سفينة بتخبط في الجبل وصوت ناس بتصرخ، جري بسرعة لمح عرعر وعصابته يخطفوا رجل وواحدة ست، وفي السفينة بنت صغيرة مستخبية.
راح بسرعة ناحية البنت وقالها تعالى معايا
قالت له: لا انا خايفة، انا عايزة بابا وماما
موشو قالها: متخفيش انا هساعدك انتِ اسمك أيه
قالتله: وردة
وخدها موشو وقالها أحكيلي ايه قلى حصل.
قالتله وردة: بابا كن ماشي بالسفينة وبعد كدا فى صخرة كبيرة خبطت المركب وفضلت تلف وتلف وفجاة خبطنا في الجبل، ومرة واحدة لقينا الوحوش هجمت على المركب وخطفوا بابا وماما وانا استخبيت تحت البطانية، بس في واحد من الوحوش شافني وانا خايفة قوى.
موشو قالها: متخفيش يا وردة انا هحميكي
وردة قالتله وهي بتعيط: انا عايزة ماما وبابا، الوحوش هتموتهم
موشو خدها وقالها انا هخبيكي هنا (حائط في الجبل شكله غريب)
وردة قالت: هتخبيني فين يا موشو دا حائط
ضحك موشو وقالها: دا مكان سحرى لازم يتفتح بكلمة السر
فلمس موشو الحائط بايده وقال (كالبلا….. كالبلا …كالبلا… ) وفجاه الحائط اتفتح ووردة خافت قوى
قالها موشو: متخفيش يا وردة وكمان متقوليش الكلمة سحرية لحد.
وجابلها أكل كتير وفاكهة ولعب علشان تلعب وتفرح وقالها: انا هروح انقذ ماماتك وباباكي.
فرحت وردة قوى وشكرت موشو، وقالها أقفلى الباب بكلمة السر إنتي فكرها.
وطلع موشو برة الحجرة السحرية ووردة قفلت الباب السحري وبدأ موشو يفكر ازاى ينقذ عائلتها من عصابة الوحش عرعر.
وراح موشو الجزيرة وجمع كل الوحوش وحكى لهم على الحكاية وازاي عرعر وعصابة مصممين يكرهوا البشر والمخلوقات كلها في الجزيرة، وكمان البلطجة والظلم قلى هما بيعملوا في الجزيرة من غير ما حد يحاسبهم، وطلب من كل وحوش الجزيرة انهم يقفوا معه ويساعده علشان يقبض على عرر وعصابته ويحبسهم أو بطردهم برا الجزيرة.
قالوا له: لا محدش يعرف يغلب عرعر وعصابته إلا ملك الوحوش، وعرعر قتله من زمان وكان له ابن وريث العرش بس هو تاه وهو صغير، علشان كدا عرعر محدش يقرد يغلبه.
موشو قال: لا احنا لازم نقف وننقذ الجزيرة بتاعتنا ولو محدش هيساعدني أنا هروح لوحدي.
ومشي موشو لوحده وهو زعلان من سلبية أهل الجزيرة وانهم أزاي راضيين بالظلم دا.
وفجأة لقي موشو شلة من اصحابوا القدام بينادوا عليه وقالوا: احنا معاك يا موشو وهنساعدك للتخلص من عرعر علشان نقدر نرجع الجزيرة زي زمان ويجوا الناس يزورونا من جديد.
وموشو قالهم لازم الأول نعرف مكان العصابة وبعدين نشوف هما مخبيين أسرة وردة فين.
ورد عليه واحد من أصحابه: عرعر وعصابته لهم كهف في أخر الجزيرة، وممكن يكونوا مخبيين أسرة وردة هناك.
وموشو قال: احنا لازم نهجم عليهم بهدوء علشان ميهربوش
وراحوا كلهم على الكهف ولقوا اثنين من عصابة عرعر واقفين على مدخل الكهف، فضربوهم وكتفوهم، ودخلوا الكهف ولقوا أسرة وردة في سجن جوا فحاولوا ينقذوهم لكن عرعر كان ساحر السجن.
ودخل موشو ولمس السجن وهمهم بكلام سحري، وفجأة السجن أتفتح. وهيصوا الوحوش صحابه وقالوا أنت الأمير وريث العرش. وخرجت أسرة وردة وهي بتقول لموشو بنتانا وردة فين؟ هي بخير؟
موشو قال: وردة عندي في الجبل متخافوش عليها أنا أنقذتها من عرعر.
وخرج موشو ولقي كل وحوش الجزيرة فرحانين وبيهيصوا أن الأمير رجع علشان يخلصهم من عرعر وعصابته.
وخرج موشو وقالهم إن لازم يكونوا أقوياء وعندهم إرادة انهم يقفوا قدام الظالم وميخفوش. وكل سكان الجزيرة بيدوا يبحثوا على عرعر وعصابته ويمسكوهم.
وبعد كدا تم القبض على عرعر وعصابته وحبسوهم، وموشو خد بابا وماما وردة ووصلهم ليها وكانوا فرحانين قوى انهم بخير. وشكروا موشو على مساعدته.
